श्रीरामपूर – श्रीरामपूर नगरपालिकेने अतिक्रमण धारकांना सात दिवसांपूर्वी दिलेल्या नोटिसीची मुदत संपल्यानंतर २८ जानेवारी २०२५ रोजी सकाळी साडेदहा वाजता नगरपालिकेच्या अतिक्रमणविरोधी विभागाने मुख्याधिकारी मच्छिंद्र घोलप, अतिक्रमण अधिकारी संजय शेळके, नगर अभियंता सूर्यकांत गवळी आदींसह पोलीस बंदोबस्तात शहरातील बेलापूर रोड पासून रस्त्यावरील अतिक्रमणे काढण्यास प्रारंभ केला.अनेक ठिकाणी अतिक्रमणधारक आजच्या दिवस मुदत द्या, अतिक्रमण काढून घेतो, अशी विनंती करत होते परंतु प्रशासनाने धडक कारवाई सुरू केल्याने मोठ्या प्रमाणात लोकांच्या मालमत्ता जमीनदोस्त झाल्या.लोकांनी स्वयंस्फूर्तीने आपली अतिक्रमणे काढली. श्रीरामपूर विभागाचे पोलीस उपअधीक्षक डॉ. बसवराज शिवपुजे व शहर पोलीस निरीक्षक नितीन देशमुख यांच्या नेतृत्वाखाली विशेष कृती दलाच्या तुकडीसह महिला पोलीसही यामध्ये सहभागी झाले असून पोलिसांचा मोठा बंदोबस्त असल्याने कोणीही फारसा प्रतिकार केला नाही. दोन जेसीबी, फायर फायटरची गाडी आणि इतर नगरपालिकेचा स्टाफ यांच्या सहकार्याने सदरची अतिक्रमण मोहीम राबविली गेली. यावेळी रस्त्यावर बघ्यांची खूप मोठी गर्दी झालेली आहे. बेलापूर रोडला पश्चिम बाजूने ही मोहीम सुरू झाल्यानंतर पूर्वेकडील लोकांनी स्वयंस्फूर्तीने आपली अतिक्रमणे काढली. खूप मोठ्या प्रमाणात या ठिकाणी पत्र्याचे शेड, दुकाने पुढे आल्याचे दिसून आले. अनेकांनी आपले सामान हलवण्यासाठी पूर्ण कुटुंब रस्त्यावर उतरवल्याचे दिसत होते.सदरची अतिक्रमण मोहीम थांबवावी किंवा दुकानदारांचा सहानुभूतीने विचार करावा याबाबत शहरातील राजकीय पक्षाच्या नेतेमंडळींनी जिल्हाधिकाऱ्यांना जाऊन साकडे घातले. आमदार हेमंत ओगले, माजी नगराध्यक्ष अनुराधाताई आदिक, माजी उपनगराध्यक्ष करण ससाने आदींनी जिल्हाधिकाऱ्यांना भेटून याबाबत विनंती केली. मात्र, जिल्हाधिकाऱ्यांनी शासन नियमानुसार कारवाई करण्याचे आदेश मुख्याधिकाऱ्यांना दिल्याने पूर्वनियोजित कार्यक्रमानुसार ही मोहीम राबविली गेली. सदरची मोहीम सुरू राहणार असून नागरिकांनी आपापली अतिक्रमणे काढून घेऊन आपले नुकसान टाळावे व नगरपालिकेला सहकार्य करावे, असे आवाहन मुख्याधिकारी मच्छिंद्र घोलप यांनी केली आहे.वरिष्ठ पोलीस अधिकाऱ्यांसह मोठा पोलीस बंदोबस्त पूर्वनियोजित कार्यक्रमानुसार ही मोहीम राबविली गेल्याने कोणालाही प्रतिकार करायची संधी मिळाली नाही. वरिष्ठ पोलीस अधिकाऱ्यांसह मोठा पोलीस बंदोबस्त घेऊन मुख्याधिकारी मच्छिंद्र घोलप, उपमुख्य अधिकारी महेंद्र तापकीरे, नगर अभियंता सूर्यकांत गवळी, किरण जोशी, अभिषेक मराठे, पूजा लांडगे, लक्ष्मण लबडे, अतिक्रमण अधिकारी अनंत शेळके, संजय शेळके, गौरव यादव, रवींद्र इंगळे यांनी आपल्या सर्व कर्मचाऱ्यांसह सकाळी पश्चिम बाजूने बेलापूरच्या दिशेने अतिक्रमणे काढण्यास सुरुवात केली. पश्चिमेकडे होणारी धडकी भरविणारी कारवाई पाहून पूर्वेकडील दुकानदारांनी तातडीने आपली अतिक्रमणे काढून आपले साहित्य वाचवण्याचा प्रयत्न केला. एका ठिकाणी काही महिलांनी प्रतिकार करण्याचा प्रयत्न केला. मात्र, पोलीस निरीक्षक नितीन देशमुख व महिला पोलिसांनी त्यांना तिथून बाहेर काढून जेसीबी लावला व पूर्ण शेड काढून टाकण्यात आले.
